GASEH KEU ALLAH
Oleh : Muhammad Safdy
Assalamu’alaikum warahmatullah
Jaroe dua blah ateuh jeumala
Seulaweut saleum keu Rasulullah
Geunaseh Allah sipanyang masa
Lewat menara panton meu kisah
Geulanto lidah bak peugah haba
Judo ta peunan gaseh keu Allah
Bek salah kaprah dum manusia
Seubab lawet nyoe laen that surah
Gaseh keu Allah jino meutuka
Keu manusia gaseh ka salah
Si ulah-ulah hana meudesya
Jikheun valentine bak tanggai lhee blah
Hana le batas mudi ngon muda
Geujak rayakan ata gob keubah
Padahai Allah hana geu ridha
Gaseh ngon sayang bandum ka jeulah
Lagee geu peugah Rasul Mustafa
Meunyoe ka haleu ngon ta meunikah
Di gata ka sah untuk meu cinta
Meubek ta peuto larangan Allah
Peu jioh bagah iblieh peu doda
Walau tan soe eu toe laot luwah
Keu azeub Allah beuna ta kira
Budaya luwa gata bek latah
Sareng beu get pah pakek keupala
Nanggroe geutanyoe Aceh meutuwah
Beda sileupah deungon eropa
Peulom digata dara nyang ceudah
Bek salah langkah dudoe keucewa
Neu peukong iman ingat keu Allah
Akhe geu keubah dalam syiruga
Uleh seubab nyan umi ngon ayah
Beu tatem papah mudi ngon muda
Beuna ta bimbing ngon ilme Allah
Mangat beu leupah apui nuraka
Meumada ‘oh noe panton lon kisah
Keu ubat susah hate nyang lara
Ta lakee do’a ka nibak Allah
Aceh meutuwah beu jioh bala
Barabung, 14 Mei 2013
Muhammad Safdy adalah mahasiswa
Program Studi Supervisi Pendidikan Islam
IAIN Ar-Raniry 2012, email: safdyhati@gmail.com
Tidak ada komentar:
Posting Komentar