Minggu, 16 Juni 2013

Pantun Muda



TAMOENG KULIYAH
Oleh: Muhammad Safdy B

Awai mula phon deungon bismillah
Pujoe keu Allah Maha Kuasa
Saleum tanyoe brie keu Rasulullah
Akhlak karimah panghule donya

Keu adoe aduen bunda ngon ayah
Saboh beureukah saleum lon sapa
Saboh hikayat sya-e ta kisah
Haba kuliyah sambong sikula

Seulamat adoe kana ijazah
Tamat aliyah atau SMA
Bah pih ujian ta kalon susah
Keuheundak Allah hana keundala

Jinoe di gata ka ta meulangkah
Ta jak kuliyah di kota Banda
Bacut peuneusan hai adek ceudah
Nasehat ayah bek ta peulupa

Umue Tuhan brie baligh ka leupah
Sidroe mukallaf ka troh bak masa
Di dalam Islam ka geu peujeulah
Nyan hukom Allah wajeb bak gata

Rukon nyang limoeng ta peubut beu pah
Meubek teusalah iman lam dada
Ta peubut suroh peu jioh teugah
Nyang larang Allah bek ta keurija

Bek gara-gara sambong kuliyah
Sileuweu teuplah aurat di luwa
Nyang dara-dara ule bek peuhah
Bek gadoh marwah gadoh agama

Walaupih adoe jioh ngon ayah
Beuna ta ilah nasehat poma
Bek teu peudaya ngoen rakan siblah
Niet jak kuliyah bek sampe cupa

Uleh seubab nyan adoe meutuwah
Taubat beu bagah ingat Rabbana
Seumoga gata tamat kuliyah
Poma ngon ayah teurasa bangga

Di Darussalam geudong that meugah
Kayem geupeugah deungon kopelma
Meunyoe teulanjo haba na salah
Ampon bak Allah meu’ah pembaca

RP Celluler, 14 Juni 2013